thjodarpuls750
mánudagur - 04. desember

Samfylkingin bætir við sig – Miðflokkurinn tapar fylgi

Helstu breytingar á fylgi flokka í kjölfar kosninga eru þær að Samfylkingin mælist nú með um 5 prósentustigum meira fylgi en hún fékk í nýafstöðnum alþingiskosningum og Miðflokkurinn um 4 prósentustigum minna fylgi en hann fékk í kosningum.

Fylgi flokka 30 nóv 2017

Tæplega 17% segjast nú myndu kjósa Samfylkinguna en tæplega 7% Miðflokkinn. Munur á fylgi annarra flokka og niðurstöðum kosninga í október síðastliðnum er innan vikmarka, en 24% segjast myndu kjósa Sjálfstæðisflokkinn, liðlega 16% Vinstri græn, rösklega 10% Pírata og sama hlutfall Framsóknarflokkinn. Liðlega 7% segjast myndu kjósa Viðreisn, ríflega 6% Flokk fólksins og rúmlega 2% aðra flokka, þar af rúmlega 1% kjósa Bjarta framtíð.

Liðlega 5% taka ekki afstöðu eða neita að gefa hana upp og nær 5% svarenda segjast myndu skila auðu eða ekki kjósa ef kosið yrði til Alþingis í dag.

Fylgistölur eru reiknaðar út frá svörum við þremur spurningum:

  • „Ef kosið yrði til Alþingis í dag, hvaða flokk eða lista myndir þú kjósa?”
  • Þeir sem voru óákveðnir voru spurðir: „En hvaða flokkur eða listi yrði líklegast fyrir valinu”?
  • Þeir sem enn voru óákveðnir voru spurðir: „Hvort er líklegra að þú kysir Sjálfstæðisflokkinn eða einhvern hinna flokkanna?”

Niðurstöður sem hér birtast um fylgi flokkanna á landsvísu eru úr netkönnun sem Gallup gerði dagana 8. til 30. nóvember 2017. Heildarúrtaksstærð var 3.991 og  þátttökuhlutfall var 57,8%. Vikmörk á fylgi við flokka eru 0,4-1,8%. Einstaklingar í úrtaki voru handahófsvaldir úr Viðhorfahópi Gallup.

Nánari upplýsingar um Þjóðarpúls Gallup