Væntingavísitala Gallup hækkar um hart nær 20 stig milli mánaða og mælist nú 140,8 stig. Sögulega hefur vísitalan mælst há kringum kosningar og eru kosningar 2021 engin undantekning. Gildi vísitölunnar nú er ríflega 80 stigum hærra en á sama tíma í fyrra og leita þarf fimm ár aftur í tímann til að finna hærra gildi.
Það að Væntingavísitala Gallup sé á tilteknum tíma 100 (lárétta línan á myndinni) merkir að það eru jafn margir jákvæðir og neikvæðir svarendur. Ef hún er hærri eru fleiri jákvæðir og ef hún er lægri eru fleiri neikvæðir.
Væntingavísitala Gallup er byggð á fimm þáttum:
- Mati á núverandi efnahagsaðstæðum
- Væntingum til efnahagslífsins eftir 6 mánuði
- Mati á núverandi ástandi í atvinnumálum
- Væntingum til ástands í atvinnumálum eftir 6 mánuði
- Væntingum til heildartekna heimilisins eftir 6 mánuði
