Stuðningur við ríkisstjórnina hefur ekki mælst minni síðan í ársbyrjun 2020 samkvæmt nýjum Þjóðarpúlsi Gallup. Ríflega 47% þeirra sem taka afstöðu segjast styðja ríkisstjórnina sem erum 14 prósentustigum færri en í síðasta mánuði.
Sjálfstæðisflokkur og framsókn tapa fylgi
Verulegar breytingar eru á fylgi flokka milli mánaða og minnkar fylgi Sjálfstæðisflokks og Framsóknarflokks á sama tíma og fylgi Pírata og Samfylkingar eykst. Tæplega 20% segjast myndu kjósa Sjálfstæðisflokkinn færu kosningar til Alþingis fram í dag, sem er um þremur prósentustigum færri en í síðustu mælingu. Þetta er minnsta fylgi sem flokkurinn hefur mælst með í Þjóðarpúlsi Gallup en mælingar hófust árið 1993. Eftir bankahrun, í nóvember 2008, mældist hann með tæplega 21% fylgi.
Fylgi Framsóknarflokksins minnkar um ríflega tvö prósentustig milli mælinga, en tæplega 16% segjast myndu kjósa flokkinn nú. Fylgi Pírata og Samfylkingar eykst um tæplega þrjú prósentustig hjá hvorum flokki, en rösklega 14% segjast myndu kjósa Pírata og nær 14% Samfylkinguna færu kosningar til Alþingis fram í dag. Fylgi annarra flokka breytist lítið eða á bilinu 0,4 - 1,3 prósentustig. Liðlega 10% segjast myndu kjósa Vinstri græn, tæplega 10% Viðreisn, næstum 8% Flokk fólksins, tæplega 5% Sósíalistaflokk Íslands og liðlega 4% Miðflokkinn.
Rúmlega 8% taka ekki afstöðu eða vilja ekki gefa hana upp og 8% segjast myndu skila auðu eða ekki kjósa.
Spurt var:
- Ef kosið yrði til Alþingis í dag, hvaða flokk myndir þú kjósa?
- En hvaða flokkur yrði líklegast fyrir valinu?
- Hvort er líklegra að þú kysir Sjálfstæðisflokkinn eða einhvern hinna flokkanna?
- Styður þú ríkisstjórnina?
Niðurstöður sem hér birtast um fylgi flokkanna á landsvísu eru úr netkönnun sem Gallup gerði dagana 1. apríl til 1. maí 2022. Heildarúrtaksstærð var 9.828 og þátttökuhlutfall var 50,1%. Vikmörk á fylgi við flokka eru 0,6-1,2%. Einstaklingar í úrtaki voru handahófsvaldir úr Viðhorfahópi Gallup.
